യാത്രയുടെ അഞ്ചാം ദിനം. ധനുഷ്കോടിയിൽ നിന്നും തിരിക്കുകയാണ്. അരിച്ചൽ മുനയും കണ്ട് ഞങ്ങൾ നേരെ പോയത് കോതണ്ഡ രാമ ക്ഷേത്രം കാണാനാണ്. സത്യത്തിൽ ധനുഷ്കോടിയിലെയും, രാമേശ്വരത്തെയും ക്ഷേത്രങ്ങൾ ഓരോന്നും ഓരോ അത്ഭുതങ്ങൾ തന്നെയാണ്. ഇത്തരം ക്ഷേത്രങ്ങളുടെ നിർമ്മിതി ഇന്നത്തെക്കാലത്ത് വലിയ പ്രയാസമുള്ളതല്ലെങ്കിലും, മോഡേൺ മെഷിനറീസ് ഇല്ലാത്ത അക്കാലത്ത് ചിന്തിക്കാൻ പോലും കഴിയാത്തതാണ്. അത്രക്ക് ഡീറ്റെയിലിങ്ങാണ് ഓരോ ക്ഷേത്രങ്ങൾക്കും. എല്ലാം കൈകൊണ്ട് നിർമ്മിച്ചവ.
കോദണ്ഡരാമ ക്ഷേത്രം
അരിച്ചൽ മുനയിൽനിന്നും രാമേശ്വരം ടൗണിലേക്ക് തിരിച്ചുവരുന്ന വഴിയിലാണ് ഈ ക്ഷേത്രം ഉള്ളത്. 1964 -ലെ ചുഴലിക്കാറ്റിൽ ധനുഷ്കോടിയിൽ നശിച്ചുപോകാതെ അവശേഷിച്ച ഒരേയൊരു നിർമ്മിതിയാണിത്. യുദ്ധാനന്തരം രാവണൻ സഹോദരനായ വിഭീഷണന്റെ പട്ടാഭിഷേകം നടത്തപ്പെട്ടത് ഈ ക്ഷേത്രത്തിൽ വെച്ചാണത്രെ. ഇതിന്റെ ഓർമ്മക്കായി എല്ലാവർഷവും ഇവിടെ പട്ടാഭിഷേക മഹോത്സവം നടക്കാറുണ്ട്. അന്ന് രാമേശ്വരത്തെ മറ്റെല്ലാ ക്ഷേത്രങ്ങളിൽ നിന്നും ആളുകൾ ഇങ്ങോട്ട് ഒഴുകിയെത്തും. കോതണ്ഡരാമ ക്ഷേത്രം കണ്ടിറങ്ങുമ്പോഴേക്കും വിശപ്പിന്റെ വിളി വന്നു. രാമേശ്വരം ടൗണിൽ പോയി പ്രഭാത ഭക്ഷണം കഴിച്ചു ഞങ്ങൾ മടക്ക യാത്ര തുടർന്നു.
ക്രൂസഡേ ഐലൻഡ്
രാമേശ്വരം സന്ദർശിക്കുന്നവർ തീർച്ചയായും സന്ദശിക്കേണ്ട ഒരിടമാണ് ഈ ദ്വീപ്. ഗൾഫ് ഓഫ് മാന്നാറിന്റെ ഭാഗമായുള്ള മനുഷ്യവാസമില്ലാത്ത ഒരിടമാണിത്. രാവിലെ ഏഴുമുതൽ ഉച്ചക്ക് രണ്ടുമണി വരയെ ഇവിടേക്ക് പ്രവേശനം അനുവദിച്ചിട്ടുള്ളൂ. രാവിലെയാണ് ഇവിടം സന്ദർശിക്കാൻ ഏറ്റവും മികച്ച സമയം. രാമേശ്വരത്തെ വിവേകാനന്ദ മെമ്മോറിയലിനു സമീപത്തു നിന്നാണ് ഇവിടേക്കുള്ള ബോട്ട് സർവീസ് തുടങ്ങുന്നത്. വിവേകാനന്ദ മെമ്മോറിയലിനു സമീപത്തായി ഒരു മറൈൻ മ്യൂസിയവുമുണ്ട്. ഐലണ്ടിലേക്കുള്ള ബോട്ടും പിടിച്ചു ഞങ്ങൾ യാത്ര തുടങ്ങി. ഇവിടേക്കുള്ള യാത്രയുടെ ഏറ്റവും വലിയ പ്രത്യേകത എന്തെന്നാൽ കടലിൽ നിറയെ ഡോൾഫിനുകൾ ഉണ്ട് എന്നുള്ളതാണ്. പതിനഞ്ച് മിനിറ്റോളം നീണ്ട യാത്രയിൽ ഉടനീളം ഡോൾഫിനുകൾ ഞങ്ങളുടെ ബോട്ടിനു സമീപത്തായി വന്നു മുങ്ങാം കുഴിയിട്ടു കളിക്കുന്നുണ്ടായിരുന്നു. പഞ്ചരമണൽ നിറഞ്ഞ വളരെ മനോഹരമായ ഒരു ബീച്ചിലേക്കാണ് ഞങ്ങൾ വന്നിറങ്ങിയത്. കൂടെ ഗൈഡുമുണ്ട്. ഈ ദ്വീപിന്റെ കാവൽക്കാരനായി ഒരു പ്രായം ചെന്ന വാച്ചർ ഉണ്ട്. കഴിഞ്ഞ 35 വർഷമായി ഇദ്ദേഹം ഇവിടെയുണ്ട്. ഒറ്റക്കാണ് താമസം. മുൻപൊക്കെ ഇവിടെ കള്ളൻമ്മാരുടെയും സാമൂഹ്യവിരുദ്ധരുടെയും ശല്യം ഉണ്ടായിരുന്നെങ്കിലും ഇപ്പോ ഫോറസ്റ്റ് ഡിപ്പാർട്മെന്റ് വളരെ കാര്യക്ഷമമാണ്. പഴയ കാലത്ത് ബ്രിട്ടീഷുകാർ താമസിക്കാനായി നിർമ്മിച്ച കുറച്ചു കെട്ടിടങ്ങൾ ഇവിടെയുണ്ട്. പലതും നശിച്ചു തുടങ്ങിയിരിക്കുന്നു. അത്തരത്തിലൊരു കെട്ടിടത്തിൽ ചെറിയൊരു മ്യൂസിയം സെറ്റപ്പ് ചെയ്തിട്ടുണ്ട്. അപൂർവങ്ങളായ കുറച്ചേറെ കടൽ ജീവികളെയും, മത്സ്യങ്ങളെയും ഇവിടെ ഫോർമാലിനിൽ ഇട്ടു സൂക്ഷിച്ചിട്ടുണ്ട്. ദ്വീപിലൂടെയുള്ള നടത്തം വളരെ വിജ്ഞാനപ്രദവും. കൗതുകം ഉണർത്തുന്നതുമായിരുന്നു. ഗൈഡ് എല്ലാം നന്നായിത്തന്നെ പറഞ്ഞു തരുന്നുണ്ട്. ക്രൂസഡേയിൽ നിന്നും തിരിച്ചെത്തി മറൈൻ മ്യൂസിയവും കണ്ട് വിവേകാനന്ദ മെമ്മോറിയലിലെ സന്ദർശനവും കഴിഞ്ഞപ്പോഴേക്കും സമയം ഉച്ച കഴിഞ്ഞിരുന്നു. വിശപ്പിന്റെ വിളി വീണ്ടും വന്നു കഴിഞ്ഞിരുന്നു.
രാമേശ്വരത്തെ താമസത്തിനിടയിൽ ഭക്ഷണം കഴിക്കാനായി പല തവണ പോയിട്ടുള്ളത് Dr. APJ അബ്ദുൽ കലാം മെമ്മോറിയലിനു സമീപത്തായുള്ള ഗ്രാൻഡ് ഡൽഹി ഫുഡ് പ്ലാസയിലാണ്‌. രാമേശ്വരത്തെ റെക്കമെന്റ് ചെയ്യാൻ പറ്റുന്ന ഒരു ഫുഡ് സ്‌പോട്ടാണിത്. സൗത്ത്-നോർത്ത് ഇന്ത്യൻ, ചൈനീസ്, പഞ്ചാബി അങ്ങനെ എല്ലാത്തരം ഭക്ഷണവും നല്ല വൃത്തിയിൽ കിട്ടും. രാമേശ്വരത്തെ ബാക്കി റെസ്റ്റോറന്റുകളിൽ വൃത്തി ഒരൽപ്പം കുറവായിട്ടാണെനിക്ക് തോന്നിയത്. ഉച്ച ഭക്ഷണവും കഴിച്ച് ഞങ്ങൾ തിരിച്ചു ഗസ്റ്റ് ഹൌസിലെത്തി. വെയില് കൊണ്ട് എല്ലാവരും തളർന്നതിനാൽ ഇന്നിനി പുറത്തിറങ്ങുന്നില്ല എന്ന് തീരുമാനിച്ചു. അന്നത്തെ വൈകുന്നേരം ബാൽക്കണിയിൽ നിന്ന് പുറത്തെ കാഴ്ചകളൊക്കെ കണ്ട് ചിലവഴിച്ചു.
രാവിലെ നേരം വെളുത്തപ്പോൾത്തന്നെ ഗസ്റ്റ് ഹൌസും വെക്കേറ്റ് ചെയ്ത് ഞങ്ങൾ വണ്ടിയെടുത്തു. ഞാനും, അച്ഛനും, അമ്മയും, കെട്ട്യോളും കൂടി വീട്ടിൽ നിന്നിറങ്ങിയിട്ട് ഇന്നേക്ക് ദിവസം ആറായി. ഇന്ന് തിരിച്ച് വീട്ടിലേക്കുള്ള യാത്ര തുടങ്ങുകയാണ്. കഴിഞ്ഞ ആറു ദിവസമായി അൾട്രോസും നിർത്താതെ ഓട്ടത്തിലാണ്. പ്രഭാതഭക്ഷണം ഗ്രാൻഡ് ഡൽഹി ഫുഡ് പ്ലാസയിൽ നിന്ന് കഴിച്ചു.
അരിയമൻ ബീച്ച്
അരിയമൻ ബീച്ചിലേക്കാണ് ഞങ്ങൾ പോയത്. ഞാൻ എൻ്റെ ജീവിതത്തിൽ കണ്ടതിൽ വച്ച് ഏറ്റവും ക്‌ളീൻ ആയ ബീച്ചായിരുന്നു അരിയമൻ. തിരക്ക് കുറവായതുകൊണ്ടാണോ എന്നറിയില്ല ഇത്രയും ശാന്തമായിട്ടുള്ളൊരു ബീച്ചും ഞാൻ വേറെ കണ്ടിട്ടില്ല. കടലിൽ ശംഖ് പെറുക്കുന്ന കുറച്ചുപേർ മാത്രമേ ഞങ്ങൾ പോയപ്പോൾ അവിടെ ഉള്ളൂ. ചെറിയ നീരാളികൾ കടലിലെ തെളിഞ്ഞ വെള്ളത്തിൽ ഓടിക്കളിക്കുന്ന. കെട്ട്യോൾ കടലിലെ മനോഹരമായ കല്ലുകൾ പെറുക്കിയെടുക്കുകയാണ്. അവിടെ നിന്നും തിരിച്ചു പോരാൻ തോന്നിയില്ല. എന്നാൽ ഇന്ന് വൈകുന്നേരത്തോടെ കുട്രാലത്തെത്താൻ പ്ലാൻ ഇട്ടതിനാൽ ഉച്ചക്കുമുന്നെ തന്നെ അവിടെനിന്നും തിരിക്കേണ്ടി വന്നു. വരും വഴിയിൽ ധനുഷ്‌കോടിയിലേക്കുള്ള റെയിൽവേ ലൈൻ ക്രോസ്സ് ചെയ്താണ് സഞ്ചരിക്കേണ്ടത്. ഇപ്പോൾ അതുവഴി ട്രെയിൻ ഓടുന്നില്ല. അവിടെ ഇറങ്ങി കുറച്ചു ഫോട്ടോയൊക്കെ എടുത്തു.
കുട്രാലം
കുട്രാലത്തിലേക്കുള്ള വഴി നിറയെ കാറ്റാടിപ്പാടങ്ങളാണ്. റോഡിന്റെ രണ്ടു സൈഡിലും നല്ല മനോഹരമായ കാഴ്ചകളാണ്. ഉച്ചഭക്ഷണം കോവിൽപട്ടിയിലുള്ള 'ഇത് നമ്മ വീട്' റെസ്റ്റോറന്റിൽ നിന്നാണ് കഴിച്ചത്. ഒരു പഴയ വീടിന്റെ ആംബിയൻസിൽ നല്ല കിടിലൻ ഫുഡ്. വൈകുന്നേരത്തോടെ കുട്രാലത്ത് മുറിയെടുത്തു. ചെറിയ മഴയുണ്ട്. പശ്ചിമഘട്ടത്തിന്റെ മറുഭാഗത്താണ് താമസം. അതുകൊണ്ട്തന്നെ മുറിയിൽ നിന്നുള്ള കാഴ്ച കിടിലനായിരുന്നു. കുന്നിൻ മുകളിൽ മഞ്ഞിറങ്ങുന്നുണ്ട്. അമ്മ മെസ്സിൽ നിന്ന് രാത്രി ഭക്ഷണവും കഴിച്ചു തണുപ്പിന്റെ പുതപ്പണിഞ്ഞു നന്നായുറങ്ങി.
അമ്മ മെസ്സിലെ പ്രഭാത ഭക്ഷണവും കഴിച്ചാണ് ഏഴാം ദിനം തുടങ്ങിയത്. മടക്ക യാത്രയായതിനാൽ അധികം സ്ഥലങ്ങളൊന്നും ഇനി ബക്കറ്റ് ലിസ്റ്റിലില്ല. CN അണ്ണാദുരൈയുടെ പിറന്നാൾ ആഘോഷങ്ങൾ നടക്കുന്നതിനാൽ കുട്രാലത്ത് നല്ല ട്രാഫിക്ക് ബ്ലോക്കുണ്ട്. വാഹനങ്ങൾ വഴി തിരിച്ചുവിടുന്നുണ്ട്. അതുകൊണ്ട് കുട്രാലം വെള്ളച്ചാട്ടത്തിലേക്കുള്ള വഴി കണ്ടുപിടിക്കാൻ കുറച്ചു ബുദ്ധിമുട്ടി. അവിടെ വലിയ വൃത്തിയൊന്നുമില്ല. ഒന്ന് മേൽ നനച്ചു തിരിച്ചുകേറി. തിരിച്ചുപോകും വഴി ടൈഗർ ഫാൾസ് കാണാൻ കേറി. പക്ഷെ അവിടെ വെള്ളം പോലും ഉണ്ടായിരുന്നില്ല.
തെങ്കാശി
സുന്ദരപാണ്ട്യപുരത്തെ സൂര്യകാന്തിച്ചെടികൾ കാണാനായിട്ടാണ് തെങ്കാശിയിലേക്ക് വച്ചുപിടിച്ചത്. പൂ വിരിഞ്ഞിട്ട് കുറച്ച് ആഴ്ചകൾ ആയതിനാൽ ഇന്ന് പോയാൽ കാണാൻ സാധിക്കുമോ എന്നറിയില്ല. എന്തായാലും ഒരു വഴിക്കിറങ്ങിയതല്ലേ ഒന്ന് ട്രൈ ചെയ്തു നോക്കാം എന്ന് കരുതി. പോകും വഴി തെങ്കാശി വിശ്വനാഥർ ക്ഷേത്രവും , അന്യൻ പാറയും സന്ദർശിച്ചു. അന്യൻ സിനിമയിലെ പാട്ടുരംഗം ചിത്രീകരിക്കാനായി അവിടുത്തെ വലിയ പാറകളിൽ പഴയ തമിഴ് സൂപ്പർ സ്റ്റാറുകളുടെ ചിത്രം പെയിന്റ് ചെയ്തിരുന്നു. അങ്ങനെയാണ് അന്യൻ പാറക്ക് ആ പേര് .ലഭിച്ചത്. അന്യൻ പാറയിലെ പെയിന്റൊക്കെ ഇപ്പൊ ഇളകിപ്പോയിരുന്നെങ്കിലും അവിടെ നിന്നുള്ള വ്യൂ അടിപൊളിയായിരുന്നു. കുറെ നേരം പാറപ്പുറത്ത് കാറ്റുകൊണ്ടിരുന്നു. തെങ്കാശി ക്ഷേത്രത്തിലേക്കുള്ള വഴികൾ ഒരൽപം ഇടുങ്ങിയതായിരുന്നു. മാത്രവുമല്ല അവിടെ വണ്ടി പാർക്കിങ്ങും ചെറിയൊരു തലവേദനയായിരുന്നു. സുന്ദരപാണ്ട്യപുരത്തെത്തിയപ്പോൾ ഒട്ടുമിക്കയിടങ്ങളിലും പൂക്കൾ വാടിക്കഴിഞ്ഞിരുന്നു. അങ്ങനെ പലരോടും ചോദിച്ചപ്പോൾ ഒരിടത്തുനിന്നും പൂക്കളുള്ള ഒരു തോട്ടം കാണാൻ സാധിച്ചു. അവിടെ കേറിക്കണ്ട് , കുറച്ചു ഫോട്ടോയുമെടുത്ത് അവിടുത്തെ നൊങ്ക് വില്പനക്കാരനാൽ സമർഥമായി പറ്റിക്കപ്പെട്ട് (ആ കഥ ഒന്നാം ഭാഗത്തിൽ എഴുതിയിട്ടുണ്ട്) തിരിച്ചുള്ള യാത്ര ആരംഭിച്ചു.
ഉച്ചഭക്ഷണം ചെങ്കൽപ്പെട്ട് നിന്നും കഴിച്ചു. വരും വഴി തൂത്തുക്കുടി വെട്ടുവൻ കോവിലിലേക്കുള്ള ബോർഡ് കണ്ടു. തമിഴ്നാട് ആർക്കിയോളജി ഡിപ്പാർട്മെന്റിന്റെ കീഴിലുള്ളതാണ് ഈ ക്ഷേത്രം. കല്ലിൽ കൊത്തിയെടുത്ത ക്ഷേത്രം എട്ടാം നൂറ്റാണ്ടിൽ പാണ്ട്യൻമ്മാർ നിർമ്മിച്ചതാണ്. സമയക്കുറവ് കാരണം ഇവിടെ കയറാൻ പറ്റിയില്ല. ഏതായാലും കേരള ബോർഡറിനടുത്താണലോ. അടുത്ത തവണ വരാം. ആര്യങ്കാവ് ചെക്പോസ്റ്റും പിന്നിട്ട് കേരളത്തിൽ കേറിയപ്പോൾ എതിരേറ്റത് നല്ല മഴയാണ്. ഒരു മണിക്കൂറോളം നല്ല മഴ കിട്ടി. വീട്ടിലെത്തിയപ്പോഴേക്കും നന്നായി ക്ഷീണിച്ചു. എല്ലാർക്കും യാത്ര ക്ഷീണമുണ്ട്. രാത്രിയിലേക്കുള്ള ഫുഡ് ഓർഡർ ചെയ്തു. ഒരു കുളിയും പാസ്സാക്കി ഫുഡും കഴിച്ച് നേരെ ഉറങ്ങാൻ കിടന്നു. ഒരാഴ്ചയായി കറക്കം തുടങ്ങിയിട്ട്. നാളെ മുതൽ വീണ്ടും പഴയ ദിനചര്യകളിലേക്ക് തിരിച്ചു പോകണം. എന്ന് പറഞ്ഞാൽ പണിക്ക് പോണം എന്ന് തന്നെ. പണിയൊന്നും എടുക്കാനില്ലാതെ ഇങ്ങനെ കറങ്ങി നടക്കാൻ പറ്റുന്ന ഒരു കിണാശ്ശേരിയാണ് എന്റെ സ്വപ്നത്തിൽ ഉള്ളത്. അങ്ങനെ ആലോചിച്ചാലോചിച്ച് ഞാൻ പതിയെ എപ്പോഴോ ഉറങ്ങിപ്പോയി.
(ശുഭം)
#oru_tamizh_kadha
#tn_road_trip_diary_part_5
