Sanchari Notebook Season 4

പുതുതായി മേഞ്ഞ പുരപ്പുറത്ത് മഴ പെയ്തിറങ്ങുന്ന ശബ്ദവും കാതോർത്തു ഞാൻ കിടന്നു. 🌧നാളെ സ്‌കൂൾ തുറക്കും. കഴിഞ്ഞാഴ്ച വാങ്ങിയ ബാഗും , കുടയും , ബ്രൗൺ പേപ്പർ പൊതിഞ്ഞ നോട്ടുബുക്കുകളും കൂട്ടുകാരെ കാണിക്കേണ്ട ത്രില്ലിൽ എനിക്കുറക്കം വന്നില്ല.☔

നനുത്ത പ്രഭാതത്തിൽ, സൂര്യ കിരണങ്ങൾ തെച്ചിക്കാടിനും , കാട്ടുചെമ്പരുത്തിക്കും ഇടയിലൂടെ മുറ്റത്തേക്ക് ഓടിക്കളിക്കാൻ എത്തുന്നതിനും മുൻപേ തന്നെ എണീറ്റു. മഴ ഇന്നലത്തേതിലും ശക്തിയായി പെയ്യുന്നു. ഉമിക്കരി കൊണ്ട് പല്ലു തേച്ച് , ഒലിച്ചുപോകുന്ന മഴവെള്ളത്തിലേക്ക് ആഞ്ഞു തുപ്പി. ഉമിക്കരിക്കറ വെള്ളത്തിൽ അലിഞ്ഞില്ലാതാകുന്നതും നോക്കി നിൽക്കെ അമ്മ അടുക്കളയിൽ നിന്ന് വെളിച്ചെണ്ണയുമായി  വന്നു. തലയിൽ നല്ലോണം എണ്ണ തേച്ചുപിടിപ്പിച്ചൊരു പള്ളി നീരാട്ട്.💦 പിന്നെ പച്ചമുളകും, കടുകും ചേർത്ത് അമ്മിയിലരച്ച തേങ്ങാച്ചമ്മന്തിയും കൂട്ടിയൊരു ചോറൂണ്. അതു തന്നെ ഉച്ചത്തേക്കായി പൊതിഞ്ഞെടുത്തു.  🍚മുട്ടറ്റം വെള്ളം പൊന്തിപ്പരന്നു കിടക്കുന്ന പാടത്തിലൂടെ നനഞ്ഞൊലിച്ച്  സ്‌കൂളിൽ ചെന്നപ്പോഴേക്കും ബെല്ലടിക്കാറായിരുന്നു. ഒരു ഭാഗത്ത് നവാഗതരുടെ കരച്ചിലും, പിഴിച്ചിലും. മറു ഭാഗത്തു 'സീനിയേഴ്സിന്റെ'  ആർത്തട്ടഹാസങ്ങൾ. ബാലമംഗളത്തിന്റെ കൂടെ കിട്ടിയ ഡിങ്കന്റെ സ്റ്റിക്കറിനായുള്ള അടിപിടി. നുള്ളിയതിന്റെ കംപ്ലയിന്റ് കൊടുക്കാൻ ടീച്ചറുടെ മുന്നിൽ ക്യൂ നിൽക്കുന്ന കുട്ടിക്കുറുമ്പുകൾ. അതിനിടയിൽ ആരോ ട്രൗസറിൽ മുള്ളിയത്രെ..!😋

വൈകുന്നേരം തിരിച്ചു വീട്ടിലേക്കുള്ള വരവ്  പരാതികളും, പരിഭവങ്ങളുമായിട്ടാണ്.  പെൻസിലിന്റെ മുനയൊടിഞ്ഞതിന്റെ, പുതിയ ഡ്രെസ്സിൽ ചളി പുരണ്ടതിന്റെ, മണമുള്ള 'മയക്ക്  ഡബ്ബർ' കാണാതെപോയതിന്റെ, ഉണ്ണിക്കുട്ടന്റെ കുടയിൽ വിസിലടിക്കുന്ന യന്ത്രം ഉണ്ടെന്നതിന്റെ. അങ്ങനെ പലവിധ പരിഭവങ്ങൾ.😭

കൊതിക്കുന്നില്ലേ ഒരിക്കൽക്കൂടി ആ പഴയ സ്‌കൂൾ കുട്ടിക്കാലത്തേക്ക് മടങ്ങിപ്പോകാൻ, പഴയ കൂട്ടുകാരെ തേടിപ്പോകാൻ,  ചെയ്ത കുസൃതികൾ ആവർത്തിക്കാൻ ? 😍

അത്തരമൊരു തിരിച്ചു പോക്ക് അസാധ്യമാണ്. പക്ഷെ നമുക്ക് സാധിക്കുന്ന ഒന്നുണ്ട്. അത്തരമൊരു കുട്ടിക്കാലം ചിലർക്ക് സമ്മാനിക്കാൻ.😗

ഒരു സ്‌കൂൾ ബാഗും , കുറച്ചു നോട്ടുബുക്കുകളും വാങ്ങാൻ കാശില്ലാത്തതിനാൽ പഠിത്തം ഉപേക്ഷിക്കേണ്ടി വന്നവർ. മുനയൊടിയാത്ത പെൻസിലും , മഷിയുള്ള പേനയും ആഡംബരമായി കരുതുന്നവർ, എത്രയോ കുട്ടികൾ നമുക്ക് ചുറ്റിലും ഉണ്ട്. കുട്ടിക്കാലത്തെ തന്നെ ജീവിതം കരിപുരണ്ടുപോയവർ.😢

അത്തരക്കാർക്ക് ഒരു നല്ല കുട്ടിക്കാലം തിരിച്ചു കൊടുക്കുവാൻ ഇത്തവണയും ഞങ്ങൾ ഇറങ്ങുന്നു. നിരാലംബരും , സാമ്പത്തികമായി പിന്നോക്കം നിൽക്കുന്നതുമായ കുട്ടികളെ കൈപിടിച്ചു സ്‌കൂളിലേക്കയക്കാൻ ഈ വർഷവും സഞ്ചാരി എന്ന ഞങ്ങളുടെ യാത്രാ കൂട്ടായ്മ ഒരുങ്ങിക്കഴിഞ്ഞു. പുതുമ മണക്കുന്ന നോട്ടുബുക്കും, കുഞ്ഞു ബാഗും വർണ്ണക്കുടയുമായി നമ്മുടെ കുട്ടികളോടൊപ്പം അവരും പറക്കട്ടെ , പുതിയ ഒരു ലോകത്തേക്ക്. ഒരു സ്‌കൂൾ കിറ്റോ അതിനുള്ള തുകയോ സംഭാവന ചെയ്തു നിങ്ങൾക്കും ഈ ഉദ്യമത്തിൽ പങ്കാളികളാകാം. 🤝

ഇനിയിപ്പോ ഒരു പെൻസിൽ മാത്രമായാൽപ്പോലും ഡൊണേറ്റ് ചെയ്യാം. അത് തിരുവനന്തപുരത്തു എവിടെയായാലും കളക്ട് ചെയ്യാൻ ഞങ്ങളുടെ വളണ്ടിയർമാർ സസന്തോഷം തയ്യാറാണ്.😎

കൂടുതൽ വിവരങ്ങൾക്ക് താഴെ കാണുന്ന സഞ്ചാരി വോളണ്ടിയർമ്മാരുടെ നമ്പറിൽ ബന്ധപ്പെടാം.☎

Ajith Kumar : 8129474746
Ram Kumar : 9995115764
Prashobh I.l : 9895673076
Sree : 9746176044

അപ്പൊ എങ്ങനാ, കൂടുന്നോ ഞങ്ങളുടെ കൂടെ,ഒരു നൂറു പിഞ്ചു മുഖങ്ങളിൽ പുഞ്ചിരി വിടർത്താൻ..?